«مكالمة تركي آل الشيخ وسر الزمالك».. 10 تصريحات نارية من عبدالله السعيد

تحدث النجم عبدالله السعيد، صانع ألعاب الفريق الأول لكرة القدم بنادي الزمالك لأول مرة في العديد من الملفات المختلفة على مدار مسيرته الاحترافية.

تصريحات عبدالله السعيد

قال عبدالله السعيد في تصريحات عبر «بودكاست»: «السوشيال ميديا هي السبب في إن اللاعيبه تقارن في الفلوس بين بعض، زمان مكنش في كدة خالص، وده دمر نجوم كتير مؤخرًا، اللاعب مينفعش يبص للتريند دلوقتي دي مشكلة كبيرة».

وعن انتقاله للأهلي قال: «أهلي كانوا خايفين إني رايح النادي الأهلي الموضوع كان صعب جدًا، الناس مجنونة كورة هناك في مدينة الإسماعيلية، وده كان طبيعي، دي حاجة مش هتقدر تتحكم فيها، مش هينفع تقنعه وده حقه، واللاعب ميزعلش برضو هي دي الكورة، الجماهير غير، وعايزاك تفضل معاهم بالحلو والمر، وإنك تحب النادي زيهم، لكن ده أكل عيشي، والنادي ممكن يجي في وقت يقول للاعب شكرًا اتفضل مع السلامة».

وأضاف: «مكنتش خايف وانا رايح للنادي الأهلي ومانويل جوزيه ساعدني وكان مُصر عليا وعايزني في الفريق، وبصراحة في الإسماعيلي صعب تحقق بطولات، وأتا تأخرت في الذهاب للنادي الأهلي وفضلت كتير علشان ألعب لـ منتخب مصر».

وتابع عبد الله السعيد: «وفي النادي الأهلي بدأت أهتم بنفسي وإن أكلي يكون صحي، ومقتنع بإن تعبي وشغلي وتواضعي سبب نجاحي ونجوميتي، وده مبدأ عندي، ومينفعش أشوف نفسي على حد أبدًا، ومش بفكر بشكل سلبي خالص».

أما عن انتقاله إلى نادي بيراميدز أوضح: «فجأة كدة جالي تليفون بليل من معالي المستشار تركي آل الشيخ وقالي ترجع مصر وتلعب في نادي بيراميدز، وكنت أنا وقتها مع فريق أهلي جدة السعودي، وقولتله أرجع الفريق كويس ومناسب ليا».

وأكمل: «ومكنش أعرف إني تاني يوم بيراميدز هيلاعب الأهلي، وكان وقتها حسام حسن بيدرب بيراميدز، وكلمني وقالي انت تمام فنيًا وعندك خبرة، وبلغته إني جاهز، ومنمتش لحد القيد وقفلت موبايلي، واتعرفت على المجموعة».

كما واصل: «حسام حسن قالي هتلعب في نص الملعب بجوار دونجا، وقولتله ماشي انت قلبك ميت بصراحة، وسجلت هدف المكسب، ولقيت مصر كلها بتشتم فيا من تاني، وكنت مستريح في بيراميدز».

وعن سبب انضمامه لنادي الزمالك قال: «بس أن بحب الأندية الجماهيرية، في بيراميدز مكنش في حماس، وحسيت إن في حاجة نقصاني، وسعيت أروح الزمالك قبل 3 سنوات من انتقالي بس الظروف منعتني بسبب أزمات الزمالك وإيقافات القيد والأمور المالية».

وزاد: «وجماهير الزمالك بتحب اللاعب اللي بيقدم للفريق وبتساعده وتسانده، حبوني قبل ما أروح، وده شجعني جدًا ودفعني للأمام، وركزت في الزمالك رغم سني، وحققت بطولات في وقت صعب، ولكل مجتهد نصيب».

وأكد: «اعتزلت دولي علشان كنت محتاج نفسي أكتر وعايز فترات راحة أكبر بدون ضغط بدني وذهني».

وأردف: «وكان لازم أسافر واحترف وأنا في الإسماعيلي أيام عرض فيينورد الهولندي، وبس أنا كنت بخاف من الغربة واللغة».

بينما اختتم تصريحاته قائلًا: «أنا نفسي بعد الاعتزال اشتغل في إدارة الكرة وأغير حاجات كتير، وهبدأ بالتأسيس السليم للاعب، ونربي أجيال لإن المواهب بتقل بسبب قلة الاهتمام بالناشئين، وده بيأثر على عقلية اللاعب، ولازم نراجع الأمور دي ونفرض على الأندية الملفات دي».