«محتاج علاج نفسي».. عبد العزيز عبد الشافي يشنّ هجومًا ناريًا ضد إمام عاشور (فيديو)

شنّ عبدالعزيز عبدالشافي، نجم الأهلي ومنتخمصر السابق، هجومًا قويًا على إمام عاشور، لاعب الفريق الأول لكرة القدم بالنادي الأهلي، مؤكدًا أن اللاعب يحتاج إلى علاج نفسي بالإضافة إلى إعادة حساباته والتعامل بجدية أكبر مع موهبته وقدراته.

وقال عبدالعزيز عبدالشافي، في تصريحات تليفزيونية عبر برنامج «يا مساء الأنوار» مع الإعلامي مدحت شلبي: «لو أنا مسؤول في النادي الأهلي، وجه عرض قوي لإمام عاشور، هسيبه لآخر السنة بعد ما أديله فرصة للعلاج، فرصة علاج نفسي، لأنه ممكن أوي يكون محتاج علاج نفسي».

وأضاف: «إمام لاعب مش عارف مصلحته، ومش قادر يعرف إن ربنا مديله قدرات عالية جدًا، وإن الناس بتأمل فيه، هو بخيل جدًا في عطائه، وطيب تبقى بخيل ليه؟ الحاجات دي اللاعب هيندم عليها بعدين، مش دلوقتي، حتى بعد ما يبطل هيفتكر ويقول يا ريتني».

وتابع نجم الأهلي السابق: «إمام غلطان في حق نفسه، والأهلي في مفترق طرق ومحتاج إن التعامل يكون بحذر، وزيزو مثلًا محتاج توجيه فني، لكن إمام لأ، محتاج قرصة ودن».

وأوضح عبدالعزيز عبدالشافي: «أعتقد إن اللي بيحصل معاه قرصة ودن، ولو هو إنسان مظبوط هيرجع، ولو مش إنسان مظبوط هيكمل، وساعتها هتلاقي إن فرصته راحت، ومحدش هيشتريه، هو كده ظالم نفسه، وأتمنى يرجع لفرقته».

ويأتي ذلك بالتزامن مع غياب إمام عاشور عن قائمة الأهلي لمواجهة مودرن سبورت في الدوري.