«كفاية بيانات واشتغلوا مش كل شوية تهديد».. شوبير يشن هجوما على مجلس الزمالك

شن أحمد شوبير حارس مرمى الأهلي ومنتخب مصر السابق، هجوما عنيفا على مجلس إدارة نادي الزمالك بسبب البيان الذي أصدره في الساعات الماضية بخصوص أزمات النادي مع اللاعبين وربطها بسحب أرض أكتوبر من النادي.

وقال أحمد شوبير في تصريحات إذاعية اليوم الخميس: "نادي الزمالك أصدر بيانا حول قضايا اللاعبين على النادي والبالغ مجموع المطلوب فيها 7 ملايين جنيه، وقال إن سبب الأزمة سحب أرض أكتوبر وإن إدارة النادي ستتحرك ضد من يلقي اتهامات باطلة ضد نادي الزمالك".

وعلق شوبير ساخرًا: "بصراحة وبكل صراححة، ملقتش في بيانك راحة وما يزعلوش مني أخواتي الأعزاء في مجلس إدارة نادي الزمالك أنت هتفضل تقول أرض أكتوبر أرض أكتوبر، ده أحنا نعملها أغنية بقه، أرض أكتوبر أيه بس، خلصت أرض أكتوبر ونوفمبر وديسمبر، أرض أيه اللي انت جاي تقول عليها".

وتابع شوبير: "هى الناس لما انتخبت مجلس إدارة نادي الزمالك انتخبت رجال أعمال وناس عندهم شطارة في التسويق، ده حسين السيد يا جماعة طلع عينه ومبيكلمش ولا بيفتح بوقه، وبعدين ما أنت خدت أرض أكتوبر جديدة بقالها كثير، وبعدين الشركة المتحدة بتساعدك كويس قوي وبتجيب لك فلوس كثير، أنت كمجلس إدارة ما تشتغل وتجيب فلوس للنادي".

وأوضح شوبير: "طيب أقول لك إن اللاعيبة حاليا عندها مشاكل كبيرة بسبب المستحقات، ولاعيبة الزمالك أبطال وصبرت عليك كثير ده معتمد جمال بيقبض على سطر ويسيب سطرين، وكمان معلقه وكل شوية تقول هجيب مدرب أجنبي ومش عارف أيه".

وأضاف شوبير: "وعلى فكرة اللي بيكلم من أبناء الزمالك وزعلان ده حبا للنادي وحرصا عليه، أنا ضد أي تعريض في السمعة أو الشرف لكن في نفس الوقت أنت كمجلس إدارة من حق الجمهور والأعضاء واللاعبين إنهم يشعروا بالاطمئنان معاكم، شوف فرقة السلة بتخسر وفرقة الكرة زعلانيين لكنهم بيلعبوا".

وواصل حارس الأهلي السابق: "أنت تعاقدت تعاقدات خاطئة أنت دفعت فلوس في لاعيبة لا تستحق أنت جبت لاعيبة ما تستهلش تمشي جنب حي الزمالك جنب منطقة ميت عقبة مش جنب بوابة النادي وممكن أقول لك الأسماء كلها وكلهم كلفوك فلوس كثيرة".

وهاجم شوبير مستنكرا بيان القلعة البيضاء: "أيه يا عم فيه أيه!؟، مش كل الأمور تهديد، تعالى قول لي أيه معالي وجفالي وأشمبونج ومش عارف مين مدافع أيه وميشلاك ده فاد نادي الزمالك في حاجة والباك رايت الكيني ده عمل ايه، ما تقول لي حضرتك، هو الموضوع كله أنتوا ماسكين لنا على الواحدة وتاني أنا ضد التجريح في الذمة أو الشرف، لكن لازم نعترف إنه كان فيه تصرفات خاطئة وتعاقدات خاطئة كلفت خزينة نادي الزمالك ملايين".

واختتم شوبير: "أنت جيت على مشاكل من المجلس السابق لكنك كررت نفس المشاكل بشكل أسوأ، يا جماعة اللي بيحصل مش حلو ومش لذيذ فأرجوكم كفاية وخلوا جمهور الزمالك يرتاح ويطمن مرة، أشتغل صح ولو عندك أخطاء صلحها يا راجل ده أنت مش عارف تعمل اجتماع مجلس إدارة".