مصطفى بكري: أقترح وضع دستور جديد.. ومن حق السيسي اتخاذ القرار الذي يراه صحيحًا

أكد النائب مصطفى بكري، أن الرئيس عبدالفتاح السيسي من حقه اتخاذ القرار الذي يراه صحيحًا ويتوافق مع الدستور، مشيرًا إلى أن الرئيس اعتاد على الصدق والنزاهة والحسم في قراراته.

وقال مصطفى بكري، خلال مداخلة هاتفية مع الإعلامي عمرو أديب ببرنامج "الحكاية": "أؤكد على عدة أمور، الأمر الأول: من حق الرئيس عبدالفتاح السيسي إنه يتخذ القرار الذي يراه صحيحاً ويتواءم مع الدستور، وإحنا اتعودنا من الرئيس الصدق والنزاهة والحسم في قراره، وأعتقد أن ما دفعه إلى هذا الأمر هو احترامه للصيغة اللي تم التوصل إليها في المواد 140 والمادة 226 التي تحظر مد الفترة الرئاسية لأكثر من مدتين.. مرتين".

وأضاف "بكري": "من هو أصل الدستور؟ المادة 4 من الدستور بتقول: السيادة للشعب.. الشعب هو مصدر السلطات، ومن بين السلطات دي السلطة التأسيسية اللي بتحط الدستور قبل ما يتعرض على الاستفتاء للشعب المصري.. طيب هل من حق الرئيس عبدالفتاح السيسي أن يصادر حق الشعب المصري في أن يكون له رأيه؟ أنا لا أتصور ذلك، ومن ثمّ إحنا قدام مرحلة صعبة، ولما يبقى فيه تحديات خطيرة جدًا بتواجه البلد كما لم تواجه من قبل على كافة الاتجاهات الاستراتيجية.. السودان النهاردة بتتضرب ومش بيتضرب بس من الدعم السريع بتتضرب من إسرائيل ومن إثيوبيا".

بكري: مصر هي الجائزة الكبرى

أوضح مصطفى بكري: "أنا ورايا خطر في الغرب والشمال الشرقي وباب المندب والمؤامرة على السعودية واللي بيتم النهاردة ده تقاسم نفوذ ما بين إيران وبين أمريكا بكل صراحة، والمستهدف هو الأمة العربية، وقلب الأمة العربية هي مصر.. زي ما قالوا قبل كده: "العراق هدف تكتيكي، السعودية هدف استراتيجي، ومصر هي الجائزة الكبرى".. التحديات دي هل تمنع إن أنا أعمل انتخابات سليمة أو غيره؟ لأ مبتمنعش.. والرئيس عملها في عز التحديات اللي كانت موجودة؛ طلّع دستور، عمل انتخابات رئاسية، وعمل انتخابات برلمانية.. لكن المرجعية لمين هنا؟ للشعب.. إذا الشعب قال لأ، هل يجوز للرئيس أن يصادر حق الشعب؟ أنا لا أتصور ذلك".

كما أوضح مصطفى بكري: "أنا عندي أمثلة.. الرئيس الصيني شي جين بينغ، لما جه في 2013 وانتُخب في 2018 ألغى الحد الأقصى لفترات الرئاسة وده خلاه يستمر، والرئيس التركي من 2003 لغاية دلوقتي موجود، أكثر من 24 سنة، ليه؟ عنده مشروع.. وهل ينكر أحد أن الرئيس السيسي عنده مشروع بناء الدولة والحفاظ على الأمن والاستقرار.. عنده مشروع اسمه المشروعات القومية الكبرى وإعادة بناء مصر من جديد وإعادة بناء مؤسسات الدولة اللي تآكلت بعد 25 يناير؟ عنده مشروع اسمه الانضباط وإعادة رد الاعتبار للقيم الأصيلة في مجتمعنا المصري؟

وتابع "بكري:" الرئيس السيسي أنت حر لكن إذا الشعب قال لأ يبقى نرجع للشعب.. والحاجة التانية الحقيقة اللي إحنا لازم نرجع ليها، لما المصريين خرجوا للزعيم جمال عبد الناصر في 9 و10 يونيو، طلع ملايين الناس والرئيس عبد الناصر كان في نكسة، ليه الناس عملوا كده؟ المصريون والشعب أكثر وعيًا من النخبة وطلع الشعب سبق الجميع وقال لعبد الناصر: كمّل وهنحارب، وجت حرب الاستنزاف ومهّدنا لحرب أكتوبر 73".

كما تابع:"النهاردة في أزمة.. أنا النهاردة لما الرئيس طلع وإحنا قاعدين في أكاديمية الشرطة وقال أنا قمت وعارضت، ليه؟ من هنا لغاية 2030 أنا كنت أتمنى إن إحنا ننتظر لكن الرئيس بشفافيته وبحسمه وبرد اعتباره حاسس إنه لازم يقول هذا الكلام من دلوقتي.. وعايز أقول كمان في المقابل إن إحنا بنفاجأ بحملة من الأفاقين والكذابين والممولين من الخارج والمتآمرين على البلد دي واللي ميعرفوش قيمة اللي حصل.. اللي حصل من 2013 لغاية دلوقتي إعجاز حقيقي والشهادات الدولية موجودة، والنهاردة توقع صندوق النقد الدولي 5.1% معدل النمو، وعامل أكبر احتياطي استراتيجي في تاريخ مصر، وبادئ مشروع قال عليه صندوق النقد الدولي—رغم إن أنا ما بحبش أستشهد بيه—إن هناك إصلاحًا اقتصاديًا في مصر وأن هناك إصلاحًا ماليًا في مصر، صحيح إن ده كان يجب أن يكون له مردود أكبر على الشعب والطبقة المتوسطة لكن إحنا هنعدي والدولة بتجني من الآن الثمار بتاعة هذه الإصلاحات اللي تمت، وكلام رئيس الوزراء في المنتدى الأخير يدي المؤشر ده".

واستطرد: "في 31 أكتوبر 2013، في المراسم العسكرية قالوا لي: تعالى، القائد العام موجود جوه ودخلت لقيت سيادته ولقيت الفريق صدقي صبحي وتلاتة قادة الأفرع الرئيسية، وأحمد زكي بدر، والدكتور محمود أبو النصر كان وزير التعليم في هذا الوقت، فبقول له: يا فندم هو أنت مش هتترشح لرئاسة الجمهورية؟ قال لي: اسمع يا أخ مصطفى، أي حد يترشح قدامه تلت تحديات: نمرة واحد مش هنقدر نقدّم أكتر من 10% للشعب المصري من حاجته، يعني اللي عايز 100 جنيه مش هنقدر نديله نظرًا للإمكانيات أكتر من 10 جنيه، وده هيولد مشاعر غاضبة.. اتنين: مؤسسات الدولة تآكلت.. تلاتة: منظومة القيم والأخلاق حصل فيها مشكلة، ومع ذلك، قبل إرادة الشعب المصري.. وفاكر يوم 27 يناير 2014، قدام المجلس العسكري سيادته قدم تقدير موقف استراتيجي، شرح 3 ساعات ونصف ليه ميبقاش رئيس جمهورية ويحتفظ ويبقى قائد عام للجيش، وأول تصويت، الكل ما عدا اتنين، ما عدا الفريق عبدالمنعم التراس وما عدا الفريق صدقي صبحي وقفوا وقالوا: يا فندم خليك معانا، إحنا الجيش عايزك، ولما اتكلم الفريق عبدالمنعم التراس والفريق صدقي صبحي وشرحوا حالة البلد وليه السيسي في هذا الوقت أُعيد التصويت مرة أخرى، وتم تكليف الرئيس السيسي.

مصطفى بكري يتحدث عن 2011 ووعود الإصلاح

أكمل "بكري": "الجيش مش ضد، والجيش نزل للشعب، وكان رافض، ونزلت الناس في 25 يناير كمان وقالت: إحنا عايزين الرئيس السيسي، ولما جه، اتكلم في 26 مارس 2014 بكل صراحة ووضوح، قال: هعمل إصلاح اقتصادي، قال: استحملوني، هصحى الساعة 5 الصبح تصحوا معايا، قال: هعيد بناء مؤسسات الدولة، قال: هعمل عقد اجتماعي بين الحاكم والمحكوم. كلنا وقفنا معاه.. ووالله لو لم يكن للسيسي من فعل سوى إسقاط حكم جماعة الإخوان الإرهابية، وإنقاذ مصر من حرب أهلية، والحفاظ على هوية الدولة المصرية، لكفى! وهذا الرجل تحمّل ما تنوء عن حمله الجبال.

بكري للرئيس: أنا معاك وبدعمك

تابع: "بنختلف آه وبنقف مع الحكومة شوية ونقف ضد شوية لكن أجي النهاردة وكأن الراجل ده معملش حاجة؟! وأشوف السوشيال ميديا إنكار الجميل والتطاول.. أنا عارف طبعًا فيه لجان إلكترونية، وخلي بالك هما مش في الخارج بس، وفي الداخل، فيه ناس في الداخل، وبقول للرئيس عبدالفتاح السيسي: لو حضرتك أنا وقفت لوحدي، أنا معاك شخصيًا وبدعم وبقول حضرتك لازم تستمر، مش عشان شخصك، شخصك مش عايز حاجة، عشان الدولة دي، عشان الدولة دي بتواجه تحديات، إحنا يا فندم البلد دي لو حصل لها حاجة مش عارفين نروح فين".

وقال: "فيه ناس كتير كانت موضع ثقة طلعت معندهاش خالص، يا فندم أنت انزل انتخابات إذا عدلنا.. أنا بقترح إن إحنا لازم نعمل دستور جديد لمصر، منعدلش، تعديل لأ، وفترتين خليهم زي ما هما، بس بتعمل دستور جديد في مصر لأن الدستور اللي فات فيه عوار كتير، كان دستور فئوي، كان دستور ناس دخلت: إدي دول كذا، وكل واحد كان بياخد حتة في الدستور ده! لأ، إحنا عايزين دستور يليق بمصر، ودستور لجمهورية جديدة اتأسست، إحنا عايزين دستور للشعب المصري يعيش.. وإذا اتوضع دستور جديد، من حق الرئيس عبدالفتاح السيسي ومن حق كل مواطن ينزل انتخابات".

وأضاف "بكري": "يطلع يقول لك: لأ ده الرئيس قال إن مش هيخش انتخابات الرئاسة إلا اللي يتخرجوا من الأكاديمية ومعاهم ماجستير.. غير حقيقي.. اسمعوا خطاب الرئيس، قال: اللي عايز يترشح يترشح، هو الرئيس هيخالف الدستور؟ الدستور بيقول في مواده الأساسية شروط المصري: لازم يكون عنده 40 سنة، مؤهل عالي، جنسية مصرية، وغير ذلك.. هيلغيه الرئيس؟ مش هيلغيه، وقانون الانتخابات الرئاسية هيلغيه؟ مش هيلغيه، ده موجود، ويطلع يقول لك: لأ، ده لازم يكون معاه ماجستير ولازم يكون معاه كذا وكذا وكذا.. إحنا بنتعرض لحملات تشويه كبيرة جداً".

كما أضاف: "عايز أقول للرئيس عبدالفتاح السيسي: انزل الشارع، اسمع رأي الناس الشرفاء، سيبك من السوشيال ميديا، أهلًا وسهلًا نحترم كل رأي وكل.. رأي وطني، مش رأي الخونة، مش رأي المتآمرين، واسألوا على حجم التمويل اللي دخل مصر الأيام دي.. يا راجل ده البودكاست بيمولوه من الخارج دلوقتي، ولازم نعرف إن بلدنا محتاجة قيادة وطنية.. المملكة العربية السعودية المؤامرة عليها واضحة مش من الحوثيين ولا من إيران ده من حتت تانية تريد أن تجبرها على التطبيع مع إسرائيل".

وواصل: "ولكن لما الرئيس وقف وقال الأمن القومي، لقينا حتى اللي بيتكلموا بمنطق القومية العربية ضده، لأ ملناش دعوة، إزاي؟! ده رمسيس الثاني قال الأمن القومي المصري يبدأ من جبال طوروس، ومحمد علي قال الأمن القومي المصري يبدأ من منابع نهر النيل، وإحنا النهاردة البعض من المتفذلكين يقول لك: لأ وإحنا مالنا ومال السعودية، ملناش دعوة.. هو البحر الأحمر ده بتاع مين ولا مضيق باب المندب؟ هو عبدالناصر في يوم من الأيام لما وقف مع ثورة 26 سبتمبر كان واقف جزء من أمن مصر كان في مضيق باب المندب؟ النهاردة المملكة العربية السعودية عملت إيه؟ هي ما لم تعتد على حد، اُعتدي عليها، هي وقفت مع الشرعية اليمنية، هي أرادت اليمن دولة موحدة، ومع ذلك يبتدي التشكيك: الرئيس بعت مش عارف إيه، والرئيس كذا، ونشوف التطاول، ومع ذلك الراجل مستحمل.

وختم بكري قائلًا: "الرئيس لما خد قرار 3 نوفمبر 2016 بالإصلاح الاقتصادي مكنش قدامه بديل، وكان عارف إن دي آثار اجتماعية، وقال إن الشعب المصري يستحق وسام الصبر والصمود، ولكن الراجل ده بياخد قرارات ربما تحدث مشكلة في الشارع، بس طول عمره بيقول لك: أنا شعبيتي لا تهمني، أنا اللي يهمني الشعب المصري ويهمني مصلحة الشعب المصري حتى لو مكنش النهاردة، والتاريخ سيحكم في يوم من الأيام على هذا الرجل بأنه تصدى وقدم نفسه وعمل المستحيل من أجل هذا الوطن، وأعاد بناء الدولة المصرية، وبدأ يبص لقدام".

مصطفى بكري يعلن معارضة الرئيس لأول مرة بسبب الانتخابات.. ماذا قال؟

الصحة: مصرع 10 وإصابة 24 شخصًا في حادث الطريق الأوسطي بالجيزة