«فيه ناس بيكرهوك».. شوبير يحذر ناصر منسي بعد أزمته مع الزمالك

وجه أحمد شوبير حارس مرمى الأهلي ومنتخب مصر السابق رسالة إلى ناصر منسي مهاجم الفريق الكروي الأول بنادي الزمالك بعد أزمته الأخيرة مع النادي عقب هدفه في مباراة الجيش الرواندي.

كان ناصر منسي قد سجل هدف الزمالك في مرمى الجيش برواندا وبعدها احتفل بشكل مبالغ فيه وقام برمي قيمص الزمالك على الأرض.

وقال أحمد شوبير: "لا شك إن ناصر منسي أخطأ وقد كتب عبر حساباته اعتذار في الساعات الماضية تاني للجماهير والجهاز الفني والكابتن معتمد جمال، بصوا يا جماعة الراجل أخطأ ومعترف واعتذر بدل المرة اثنين، سيب بقه نادي الزمالك ياخد قراره متبقاش ضاغط إن ناصر منسي لازم مش عارف أيه، فيه إدارة وفيه مدير فني وهما يقرروا".

وتابع أحمد شوبير: "كابتن معتمد مش مركز في الأزمة ومركز في مباراة فريقه النهاردة، وناصر كده كده مستبعد من التدريبات الجماعية، وتوقعي الشخصي إنه بعد مباراة الجيش الرواندي هتكون أزمة ناصر منسي قد انتهت بقرار معلن وهيكون القرار الاكتفاء بإيقافه مباراتين أمام بترول أسيوط النهاردة ومباراة العودة أمام الجيش الرواندي".

وأوضح شوبير: "بس خلينا نتفق أيا كان اسمك وايا كانت نجومتيك، إن فيه إطار عام الجميع بيشتغل جواه وفقا لمصلحة الفريق، وكلنا بنغلط وكلنا بنخرج عن شعوربا لكن أحيانا بيبقى فيه حتة تلاكيك مينفعش، وبيبقى مبالغ فيها جدا، يعني مفيش اثنين عاقلين في مصر مش مقتنعين إن ناصر منسي أخطأ لإن ناصر نفسه معترف وعمال يعتذر فهتيجي انت تبرر له خطأه وهو معترف به".

وأضاف شوبير موجها رسالة لناصر منسي: "تاني بقول لك ناصر ولد كويس قوي وشديد الطيبة وأخلاقه هايلة وابن حلال جدا، لكن أنت النهاردة بقيت قدوة للناس كلها، وأوعى تفتكر إن مليكش أعداء ومليكش ناس بيكرهوك لأ يا باشا فيه كثير ما بيحبوش الخير للناس".